EDITORIAU DÓU SENDI DE LA MANTENÈNÇO DE LENGADÒ-ROUSSIHOUN

 Raport mourau dóu Sendi de Lengadò-Roussihoun, leituro dóu dilun 21 de mai de 2018

pèr l’Acamp dóu Counsèu Generau dins la vilo de Brageira en Dourdougno.

 

 

Segne Capoulié, gènto Rèino, car counfraire e cars ami felibre, vous voudriéu dire que siéu un Sendi crespina e fisançous, d’abord qu’ai un flame Burèu que respondon toujour de o en tóuti mi espèro, acò ei tras-qu’impourtant pèr m’ajuda de teni bèn l’empento, sènso nous esvarta de trop di piado de nòsti davancié. Ço que me baio fisanço tambèn, que me baio l’enavans, ei l’encartamen regulié di felibre nouvelàri. Ei tambèn li nouvèllis afihacioun dis escouleto e dis adesioun dis escolo felibrenco. De que i’a miés que lis escolo pèr ensigna e trasmetre nosto lengo e nosto culturo.

Tre 2013 pèr moun eleicioun de Sendi de la Mantenènço de Lengadò-Roussihoun, vous ai anouncia que vouliéu crea d’escouleto, ei ço qu’avèn fa, n’avèn crea cinq, e dempièi dos fuguèron aproubado escolo felibrenco, basto qu’acò countunièsse dins aquesto draio. Cade an avèn demando d’escouleto nouvelàri, o de demando d’ensignamen de prouvençau dins mant un vilage e vilo d’encò nostre, mai sian óubliga, pèr manco d’ensignaire, de li faire pacienta.

Tre 2014 vous ai anouncia la voulounta d’ourganisa d’ataié de fourmacioun d’ensignaire bountous pèr lis escoulan coumençaire. Coume à moun vejaire li causo prenié trop d’alòngui, me n’en siéu encarga en 2017. Pèr acò faire e coume siéu pas dóu mestié de l’ensignamen, me siéu ispira di cous dóu regreta Majourau e ami Jan-Marc Courbet, qu’ai repica, revesita e asata au terraire nostre li 26 leiçoun de soun COUS DE PROUVENÇAU annado proumiero. Ai fa un suport pèr lis escoulan e un suport, revira au francés e proun argumenta pèr l’ensignaire. Mèfi aquesto “fourmacioun” d’aqui s’adrèisso soulet is ensignaire coumençaire, d’abord qu’ai pas la pretencioun de baia de leiçoun à quau que siegue e encaro mens pas is ensignaire counfierma que me fan un travai remirable, mai prepause acò en li que tènon un pau la lengo e la culturo nostro, e, que la voudrien bèn espandi. Au proumié ataié d’óutobre avèn agu 16 voulountàri que lou soun vengu segui. Aquest an déurian pousqué presenta un proujèt pèr l’ensignamen dis escoulan d’annado segoundo, n’en parlaren à l’acamp di Cabiscòu lou 22 de setèmbre.

Me vau, aro, prepausa uno meno de fourmacioun pèr li Cabiscòu nouvelàri, moun doursié un cop mounta lou presentarai à moun Burèu. Ei de bon verai que li jóuinis escolo soun beilejado pèr un Burèu sènso trop d’esperiènci pèr persegre li draio dóu Felibrige, acò tambèn lou presentarai à l’acamp di Cabiscòu lou 22 de setèmbre venènt.

L’image es un di bon mejan de trasmetre la culturo nostro, ei pèr acò que tène de manteni noste festenau de filme de culturo d’O, dubert au grand publi. Un tau festenau nous permés d’encouraja li cineasto amatour de faire de metrage dins nosto lengo terradourenco, mai tambèn de pesca demié nòsti felibre, ami e couneissènço de presto-mourre de la parladuro regiounalo. S’agis d’un festenau qu’aviéu crea pèr lou Ciéucle Lengo d’O en 2011, mai despièi aquest an de 2018 lou fai prene en cargo pèr la Mantenènço.

Voudriéu acaba pèr La Grand Felibrejado dis Escolo. S’agis d’uno bello journado de rescontre felibren, que nous permés de nous faire counèisse à-n-un publi qu’ei pas toujour assabenta de nosto eisistènci. Aqui tourna-mai, aquesto acampado fuguè creado pèr faire rescountra nòstis escolo, e pousqué presenta ço que fan au siéu. De-segur coume touto causo fau de tèms pèr pousqué inculca quicon de duradis e fidèu.

Avèn teni bon pèr li Cafè Prouvençau e aro ei quicon qu’es escrincela dins li tradicioun nostro. Ho ! ei pas que “La Grand Felibrejado” marchèsse mau, noun, noun, mai moun vejaire à iéu èi que manco encaro d’engajamen, d’emplicacioun e de voulounta de la part de nòstis escolo. Es en chifrant en acò qu’ai pensa d’espandi, tre aquest an, uno meno de targo culturalo, ounte lis escolo s’afrountarien en cansoun, pouësìo, tiatre ou danso. Li vole tóuti rassegura, s’agis simplamen d’uno targo amistadouso, sènso pountin pèr enaura li vincèire, mai au contro, tóuti li participant n’en sourtiran que mai grandi. Aquest an saren à soun ourganisacioun Venco, se debanara dins lou poulit vilajoun Gajan de Gard. Dins aquest vilajoun avèn qu’un soulet felibre, basto qu’aquesto manifestacioun fara mestié pèr desvela demié li Gajanen quàuqui èime felibren. Espère d’aguè pas trepassa lou tèms que m’èro acourda, vous gramacìe pèr vosto atencioun.

 

Cigalo de la Patrìo, Gabriéu Brun Sendi de Lengadò-Roussihoun

Raport mourau dóu Sendi de Lengadò-Roussihoun, leituro dóu dilun 21 de mai de 2018 pèr l’Acamp dóu Counsèu Generau dins la vilo de Brageira en Dourdougno.

Agenda

< 2020 >
Juillet
DLMMJVS
   1234
567891011
12131415161718
19202122232425
262728293031 
© Le Felibrige Tous Droits réservés | Réalisation Dream Media® 2016 - Mentions légales et crédits