VERBAU DE L’ACAMP MANTENENCIAU DE SANT-GILE

Verbau 

de l’Acamp Generau dóu Felibrige 

Mantenènço de Lengadò-Roussihoun

dóu dissate 27 d’abriéu de 2019 

à la salo poulivalènto Roubert Marchand, 

38 avengudo Emile Cazelles, à Sant-Gile de Gard, 

Aculi pèr l’escouleto La Sant-Gilenco

 

L’Acamp Generau dóu Felibrige Mantenènço Lengadò-Roussihoun s’es acampa souto la presidènci dóu Sendi lou Majourau Gabriéu BRUN, en presènci dóu Capoulié En Jaque MOUTTET, dóu Majourau  Gui CHAPTAL, assista di mantenèire Sèrgi NURIS lou Secretàri, Glaude GALANT lou souto-Clavaire, de Pau ASTRUC, de Gui BOURNETON e de Felip REIG li souto-Sendi.

 

Lou Secretàri anóuncio : 1°/ RAMPÈU DI PRESÈNT E DI REPRESENTA : 

 

Lou Sendi : – Midamo e Messiés avèn d’encarta au 11 de mars de 2019 :     238 felibre emé 13 escolo felibrenco

Voutant (presènt e poudé) :                 71 Presènt +          43 Poudé =       114 Voutant

Lou quorum óutengu èi de : 48%     (pèr 15 % requist).

Lou quorum estènt largamen requist poudèn soumetre à voutacioun l’aproubacioun di raport financié, d’ativeta e li proujèt, èi 10 ouro 07 declare dounc la sesiho de l’Acamp Generau dóu Felibrige Mantenènço de Lengadò-Roussihoun duberto.

Lou Secretàri : – L’Acamp Generau pòu dounc delibera e vouta souto la presidènci dóu Sendi lou Majourau Gabriéu BRUN, en presènci dóu Capoulié En Jaque MOUTTET, dóu Majourau  Gui CHAPTAL, assista di mantenèire Sèrgi NURIS lou Secretàri, Glaude GALANT lou souto-Clavaire, de Pau ASTRUC, de Gui BOURNETON e de Felip REIG li souto-Sendi.

La Majouralo Marìo-Nadalo DUPUIS Assessour de Lengadò-Roussihoun, Lou Majourau Jan FOURIÉ, lou Majourau Roubert ROUSSET, lou Majourau Enri BARTHÈS, Lou Majourau Jan-Francés COSTE, noste Clavaire Enri ALCON, soun desencusa.

Avèn tambèn de desencusa mant un mantenèire qu’an pas pouscu se gandi à Sant-Gile de Gard vuei e que nous an manda poudé ; ié mandaren peréu lou Verbau de la sesiho dins quàuqui semano.

Lou Sendi : – Capoulié En Jaque MOUTTET ; Moussu lou Maire de Sant-Gile Eddy VALADIER ; Capitàni Majourau Gui CHAPTAL ; Gènto Rèino d’Arle 16 enco Sabino MISTRAL ; Moussu Michèu Durand-Roger Presidènt de l’assouciacioun d’Istòri, d’Arqueoulougìo, Sauvo-gardo de Sant-Gile; Cabiscòu  de l’Escouleto La Sant-Gilenco Bernat POUJOL e soun car Burèu ; Mi car Membre dóu Burèu Sèrgi Nuris, Glaude Galant, Pau Astru, Gui Bourneton e Felip Reig.

Cabiscolo, Cabiscòu e ensignaire vous gramacìe de vosto presènci, que sènso lis escolo nous poudrien viéure, espeli e s’espandi, astru e osco en tóuti.

Midamo e Messiés li counjoun, Gèntis Arlatenco, càri manteneiris, car mantenèire, bèn lou bon-jour en tóuti, vous gramacìe d’agué respoundu de O à noste counvit à l’Acamp Generau, sian forço ounoura de vosto galanto presènci, e, vosto moubilisacioun noumbrouso n’ei la marco d’un estacamen au Felibrige di mai afeciouna, osco en tóuti e vous souvetan la bèn-vengudo.

Moussu Lou Coulounèu Laurèns GREBIL (Coumendant lou 503 cinq-cènt-tresen Regimen dóu Trin, de Garoun) regrèto de pas pousqué participa en noste Acamp, ei regretous d’abord qu’es un ome qu’a un respèt di mai prefouns pèr la culturo nostro, ei tout naturalamen que lou desencusan.

Voudriéu faire un gramaci particulié à Moussu lou Maire de SANT-GILE, Moussu Edi Valadier.

Vous gramacìe Moussu lou Maire de nous reçaupre tant poulidamen dins vosto galanto vilo de Sant-Gile de Gard en Camargo Gardeso. Vilo medievalo em’ un passa istouri, religious e un negòci fluviau di mai drud, ciéuta que sènso relàmbi ei lausado, aparado e amado pèr sis estajan, sis assouciacioun e sis elegi. Sabèn l’interès que pourtas à la culturo e i tradicioun nostro e vosto acuiènço n’ei bèn la desmoustranço d’aquest estacamen, gramaci pèr tout acò. Daumage que noun poudès resta emé nautre, e regrète de pas agué l’ounour de parteja lou repas emé vous.

Moussu lou Capoulié, sabe coume voste tèms ei precious, sabe li milanto kiloumètre que percoulas chasque an, mai voste prefouns estacamen à la Mantenènço de Lengadò-Roussihoun vous acamino devers nòstis Acamp Generau, qu’ounouras de vosto Majo presènci, n’en siéu pertouca à l’esmougudo, vous gramacìe dóu founs dóu cor Capoulié En Jaque MOUTTET de vosto flamo recouneissènço.

Siéu urous de souligna la presènci de noste valènt Capitàni VIIen de la Nacioun Gardiano lou Majourau Gui Chaptal, te fai mis astru di mai courau pèr toun bèu travai, emé mi couràlis amista.

Me dève de gramacia e de bèn-astruga la flamo participacioun dóu Burèu de l’Escouleto La Sant-Gilenco qu’an fa soun proun pèr nous bèn reçaupre, avès Moussu lou Cabiscòu Bernat Poujol uno colo di mai atravalido, devouado e afeciounado pèr bèn faire, osco e astru en tóuti.

Gramacìe moun estima Burèu pèr soun devouamen e soun indispensablo ajudo, pèr soun soustèn permanènt. Gramacìe tambèn li que travaion dins l’oumbrun fin de persegui sèmpre la bono draio, e pamens soun pas jamai nouma, adounc ié fai ma capelado.

 

Lou Sendi :- 2°/ REMEMBRANÇO DI FELIBRE DEFUNTA :

 

– Moussu Ive Clerc                                                     de Marsihargue d’Erau

– Jóusè Roumaniho                                                    de Mount-Pelié d’Erau

– Daniso Serre                                                           de Vergezo de Gard

– E aquest an, i’a gaire de tèms, Jo Vidal                     de Lunèu d’Erau 

Mai tambèn nous fau apoundre à-n-aquesto tristo tiero, tóuti li proche de nòsti felibre desparti dins l’annado de 2018 e en aquesto debuto d’an, qu’emé forço peno avèn acoumpagna pèr sèmpre…

En memòri i defunta, vous demande d’agué uno pensado coumpatissènto en tóuti aquélis aprefoundi dins lou dòu d’un proche, en remembranço d’en tóuti me vau vous demanda d’óusserva uno minuto de reculimen.…

Que Nosto Santo Estello ié duerbe li porto dis Aliscamp, vous gramacìe.

Après li peno ei l’ouro de l’espèr en l’avenidou, à l’esperanço :

Despièi la Santo-Estello de Brageirac nosto Mantenènço s’es endrudido de dos Escouleto sòcio : Lou Plantié de Marsihargue d’Erau, afiscado pèr soun Ensignaire e Secretàri lou Mèstre d’Obro Nouvè Danielo, que salude e bèn-astrugue pèr soun bèu travai. Nouvè es representa vuei pèr Adelino MARTINEZ.

Mai tambèn l’Escolo d’Argènço de Fourco de Gard, beilejado pèr Patricia Disset, que s’es encartado au Felibrige, an dubert un ataié de lengo, li cous de prouvençau soun ensigna pèr lou Mèstre d’Obro Felip Reig.

Avèn agu lou grand plasé de bèn-astruga l’ensignarello Séuveto Farneti de Lunèu en Lengadò pèr sa nouminacioun de Mestresso d’Obro pèr lou Counsistòri.

Séuveto qu’ei tambèn nosto countourroularello di comte.

Mai tambèn noste valènt e coumpetènt Secretàri Sèrgi Nuris à reçaupu dóu Counsistòri uno letro de felicitacioun.

Poudèn que de pica di man pèr li bèn-astruga pèr lis obro que coumplisson au sen dóu Felibrige. 

 

Lou Sendi anóuncio3°/ ACUIÈNÇO DI FELIBRE NOUVELÀRI ENCARTA AU FELIBRIGE EN 2018 pèr noste Secretàri Sèrgi Nuris :

 

Avèn agu lou bounur d’encarta vint-e-un felibre nouvelàri que me vau nouma, (li felibre presènt dins la salo se podon auboura à l’anóuncio de soun noum:

01) Mmo   ANDRÉ Gabrielo                               de SANT-GILE (de Gard)

02) M      COCHET Maurise                             de SANT-GILE (de Gard)

03) Mmo   COGET Gineto                                  de SANT-GILE (de Gard)

04) M      CROUZET-VERRIEUX Jan-Glaude                de SANT COUMO E MARUEJOL (de Gard)

05) Mmo   DANIELE Frederico                           de MARSIHARGUE (d’Erau)

06) Mmo   DUSIO-BRUNEL Aneto                     de SANT-GILE (de Gard)

07) Mmo      EYMARD Cecilo                               de BAGNÒU-DE-CESE (de Gard)

08) M      FABRE Jan-Louïs                              de GAROUN (de Gard)

09) M      FABRE Bernat                                  de GAJAN (de Gard)

10) Mmo   FAVÈDE Jóuseto                              de MANDIUEL (de Gard)

11) Mmo   GRONCHI-BLANC Pèireto-Emilìo      de SANT-GILE (de Gard)

12) Mmo   GUIBAUD Auroro                              d’ARLE (di Bouco-dóu Rose)

13) M      LAVAUDEN Jan-Gabriéu                   de MARSIHARGUE (d’Erau)

14) Mmo   MARTINEZ Adelino                           de VILATELLO (de Gard)

15) M      MERCIER Jan-Marìo                        de NIME (de Gard)

16) M      OLLIVIER Jan-Loup                           de BAGNÒU-DE-CESE (de Gard)

17) M      POUJOL Bernat                                de SANT-GILE (de Gard)

18) M      RIEUX Jan-Roubert                           de SANT-GILE (de Gard)

19) Mmo      ROUQUET-AMIGO Bregido               de BOUIARGUE (de Gard)

20) Mmo      SAUCLIÈRE Jano-Françoun              de LUNÈU-VIÈI (d’Erau)

21) Mmo   TERREUX Genevivo                        dóu GRAU-DÓU-RÈI (de Gard)

 

ARO ANAN FAIRE L’ACUIÈNÇO DI NÒU FELIBRE NOUVELÀRI ENCARTA AU FELIBRIGE DESPIÈI LA DEBUTO DE 2019:

– (li felibre presènt dins la salo se podon auboura à l’anóuncio de soun noum)

 

1) Mmo BERTAUD Genevivo                         de SANT-GILE (de Gard)

2) Mmo DAGAND Couleto                              d’ARLE (di Bouco-dóu Rose)

3) Mmo DAMIENS Doulourés                         de FOURCO (de Gard)

4) Mmo DUSSERRE Chantal                         de SANT-GILE (de Gard)

5) Mllo GRANDMAISON Estello                    d’ARLE (di Bouco-dóu Rose)

6) Mmo GUTIERREZ Eleno                            de SANT-ESTIENE DÓU GRES (di Bouco-dóu Rose)

7) Mmo LUCCHESI Courino                           de SANT-ESTIENE DÓU GRES (di Bouco-dóu Rose)

8) M    NOUGUIER Roubert                         de COUDOULET (de Gard)

9) Mmo THEISEN Lino                                   de MARSIHARGUE (d’Erau)

 

Lou Sendi : – Gramaci Secretàri

Lou Sendi : – Vous bèn-astrugan car felibre nouvelàri e vous souvetan la bèn-vengudo dins nosto famiho dóu Felibrige, vous souvète, en tóuti, uno caminado felibrenco endrudissènto e agradivo.

Vòstis encartamen nous encourajon de buta que mai à la rodo, car vosto vengudo coumpènso nòsti mancanço, d’abord qu’en 2018 entre demessioun, cambiamen de Mantenènço e despartido avèn agu sèt felibre de mens.

Chasque an ei coume acò, la rodo viro pas toujour coume nous agradarié, mai pèr assaja de cambia li causo, avèn devé de vous interessa, escouta, prepausa, avaloura pèr que chascun de vous se recounèisse en Mantenèire pèr de bon recouneigu.

Vous gramacìe e vous bèn-astrugue, longo e bono caminado felibrenco en tóuti.

La paraulo ei dounado au Cabiscòu de la Sant-Gilenco, Bernat POUJOL : es ounoura de reçaupre l’Acamp Mantenenciau, e gramacìo forço sis escoulan pèr la preparacioun e la decouracioun de la salo. Mai tambèn bèn-astrugo soun ensignaire pèr la qualita de si cous e d’agué sachu lis endraia dins li piado dóu Felibrige.

 

Lou Secretàri anóuncio : – 4°/ APROUVACIOUN DÓU VERBAU DE L’ACAMP GENERAU DE 2018 DE VAU-VERD

 

Lou Sendi : Lou Verbau, redigi pèr noste Secretàri Sèrgi NURIS, vous fuguè manda au mes de mars passa. Chascun l’a pouscu legi dins soun tèms, e, coume pèr l’ouro ai pas jamai reçaupu de desaprouvacioun o de remarco me vau vous demanda, se lou voulés bèn, de vouta soun aprouvacioun à man levado :

Quau es contro ? 0        Quau s’astèn ? 0       Lou verbau es adóuta à l’unanimeta

Vous gramacìe…

Lou Secretàri : – Vous voudriéu tambèn demanda, coume avèn de frès poustau forço de trop impourtant, se sarias d’acòrdi de reçaupre lou Verbau pèr la telaragno ?

Lou metren tambèn subre lou Site : http://languedoc-roussillon.felibrige.org/

Quau es contro ? 0        Quau s’astèn ? 0      La proupousicioun es adóutado

Vous gramacìe …                    :

 

Lou Secretàri anóuncio : – 5°/ RAPORT MOURAU DÓU SENDI :

 

Lou Sendi : – Segne Capoulié, Midamo e Messiés lis elegi, Moussu lou Majourau, Casbiscolo e Cabiscòu, Ensignarello e Ensignaire, Felibresso e Felibre, Midamo e Messiés, lou role de Sendi es uno toco pas gaire eisado d’assegura. Se devèn d’èstre atentiéu, creaire, atenciouna, dubert, mai nous fau èstre vigilènt, capable de prene de decisioun que saran pas toujour bèn acetado. Mau-grat que siegue pas toujour bèn eisa de beileja, au poste maje, uno Mantenènço Felibrenco, assaje de l’assegura de moun miéus, emé tout moun èime e ma determinacioun.

– Acò noun se poudrié faire sènso l’ajudo de moun Burèu, qu’emé li qualita e li poussibleta de chascun, m’ajudon de teni bèn dre l’empento. Fai moun proun pèr segui de moun miéus li piado de nòsti davancié, tout en assajant de crea e presenta de nouvèu proujèt. Proujèt que dèvon pourta fru, pas que de vèire l’encartamen regulié di felibre nouvelàri chasque an, acò ei la garroto que m’encourajo de persegui moun pres-fa e que me baio l’enavans pèr lou coumpli.

– Poudriéu cita lis afihacioun dis escouleto e lis adesioun dis escolo felibrenco, d’abord que lis escolo soun indispensablo pèr ensigna la lengo e la culturo nostro. Mai pèr li bèn faire teni bon, lis escolo, me fau de Cabiscòu e d’Ensignaire atenciouna, embuga de l’èime mistralen, qu’an la fe pèr ço que fan e que prenon plasé de trasmetre si couneissènço is escoulan de tout nivèu e de touto espèro.

– Oi ! Tóuti lis escoulan se dèvon lou meme respèt, la memo atencioun, lou meme interès, de la part de nòstis ensignaire, d’abord que nous fau bèn coumprene qu’ei pas eisa à-n-un adulte de buta la porto de nòstis escolo, quand i’a de tèms e de tèms qu’an quita li banc de l’escolo de la Republico.

– Coume m’agrado de vous lou dire noste passat ei noste aveni, car noun poudèn agué d’aveni sènso trasmetre noste drud patrimòni culturau. Acò di, gènto Cabiscolo e Ensignarello, car Cabiscòu e Ensignaire, vous fai mis astru di mai courau pèr la bello obro que coumplissès dins vòstis escolo.

– Sabe coume ei coumplica d’ensigna, sabe que la maje part d’entre nautre soun que de bountous, que sian pas dóu mestié, qu’ensignan emé lou cor la culturo que nous fuguè trasmesso, alor que fuguessian dóu mestié o simple passaire de culturo, coume iéu, fasen lou emé lou cor dins lou respèt de l’èime mistralen.

– L’an passa avèn soustengu lou doursié de demando de recouneissènço au patrimòni inmateriau de l’UNESCÒ de la Federacioun Franceso à l’aflat de la Cousso Camarguenco. Mai se trobe qu’uno talo demando pèr l’esport unicamen noun poudra passa, assabenta d’acò s’ei creado uno assouciacioun que i’an mes “Association Cultures et Patrimoines Camarguais”, se sian recampa tres cop e lou dissate 6 d’abriéu passa en presènci dóu Majourau Gui Chaptal, dóu souto-Sendi Felip Reig, de la Mestresso d’Obro Ano-Liso Chivalié, d’uno pougnado de felibre e dóu Sendi avèn participa à l’Acamp Generau d’aquesto novo assouciacioun. Emé lou souto-Sendi Felip Reig, coume fasèn partido de la coumessioun culturo, avèn decida d’afiha la Mantenènço pèr un escoutissoun de 50 éurò, espère qu’aqueste darrié doursié pourtara fru e que daveraren à la recouneissènço d’UNESCÒ.

– Mai councernènt aquest presentacioun de doursié, d’un las avèn de voulounta de bèn faire, sènso chifra à noste interès persounau, mai à l’interès de l’aparamen de nosto culturo, e, d’un autre las avèn d’ourganisaire d’espetacle qu’an pas vergougno, au noum se-disènt de nosto culturo, d’ourganisa uno : “Corrida Provençale” em’un “passeò” dóu quadriho “enmasca” en tengudo de gardian, oi li matador en braio de darboun e au capèu de fèutre e acoumpagna de nòsti bèllis Arlatenco, vesès lou tablèu. Quent image de nosto culturo camarguenco auran lis estiven presènt sus li tiatre ? Alor que de-longo fau s’afisca de bèn esplica que la cousso camarguenco e la corrida soun dos culturo taurino dóu nostre mai bèn despariero. Adeja qu’ei coumplica, à l’ouro d’aro, de rempli lis areno, aqui sarien au coumençamen de la fin de nòsti tradicioun camarguenco, poudèn lucha e bagna camiso pèr apara nòsti tradicioun, quand vesèn tàli causo. (Avèn aprés despièi que se devrié faire uno capelado à respèt de nòsti dos tradicioun taurino, osco pèr acò.)

– L’an passa vous aviéu assabenta qu’après quatre an de courrespoundènci e de vesito, uno famiho procho de Frederi MISTRAL e de Nicoulau LASSERRE an tengu de pourgi à la Mantenènço de Lengadò-Roussihoun, souto coundicioun rigourouso, li còpi manuscricho de l’obro coumplèto de Nicoulau LASSERRE. S’agis d’uno douno remirablo, de 21 Libret data de 1944, 17 Libret data de 1945, de 16 Crounico (noun datado), presentado en 16 Caièr d’escoulan caupènt saineto, galejado e autre, pièi 13 Pichot caièr d’escoulan emé nouvello, pajo istourico e proso rimado, e pèr acaba 4 rouman que n’en vaqui li titoul :

– Proumié) La Gardiano : Rouman Camarguen de 258 pajo, en 26 caièr data dóu 06 de nouvèmbre de 1945. Em’un avans-prepaus que Mèste Nicoulau rapello si darrier escri e endico que mando à flour e mesuro uno còpi à soun grand ami Pradier à-z-Ais de Prouvènço.

– Segound) La Camargo e si Vilo perdudo : rouman istouri, de 214 pajo en 20 caièr. Data dóu 04 d’abriéu de 1946

– Tresen) La Fauto de Mèste Gaspard : rouman dóu Campèstre en dos partido l’uno de 100 pajo e l’autro de 180 pajo, lou tout en 27 caièr…

– Quatren) Conte de Paris e d’Aiours 160 pajo en 18 caièr, data dóu 05 d’abriéu au 11 de jun de 1946

Emé l’autourisacioun di dounatàri e lou Burèu avèn decida d’edita aquésti rouman, coumençaren aqueste an d’aqui pèr lou proumié, valènt-à-dire La Gardiano.

Voudriéu acaba moun raport mourau en vous disènt ma fisanço en l’endevenidou de nosto Mantenènço de Lengadò-Roussihoun, fisanço en nòstis escolo qu’an lou soucit de bèn faire, fisanço i felibre nouvelàri que sabon lou perdequé de soun afihacioun au Felibrige e l’engajamen qu’an pres en rintrant dins nosto famiho, fisanço à la jouvènço que prenon counsciènci de la fragileta de nosto culturo.

Alor oi ! quand vous vese tóuti tant noumbrous e fidèu à noste Acamp Generau, mau-grat tóuti li noumbróusis ativeta de lesé que se presènton à vous, qu’escoutas religiousamen lis intervencioun de chascun, iéu me dise que nous fau agué fisanço en l’endevenidou, car la responso es aqui, dins aquesto salo, en militant pacifi butas tóuti à la rodo de nòsti valour felibrenco emé fe e determinacioun, osco.

Vaqui pèr moun Raport Mourau, vous gramacìe

Lou Sendi : Car felibre avès-ti de questioun ? : pas cap de questioun. 

Bon aro me vau vous demanda d’aprouba moun raport mourau. 

Quau es contro ? 0        . Quau s’astèn ? 0     Lou raport es adóuta à l’unanimeta

Vous gramacìe…

 

Lou Secretàri : – 6°/ RAPORT D’ATIVETA DE LA MANTENÈNÇO DE LENGADÒ-ROUSSIHOUN PÈR L’ANNADO DE 2018

 

Lou Secretàri : – Capoulié En Jaque MOUTTET, Majourau Gui CHAPTAL, car membre dóu Burèu Mantenenciau, Mantenèire, Midamo e Messiés. Aquesto annado de 2018 lou Sendi de la Mantenènço de Lengadò-Roussihoun, a percoula forço e forço kiloumètre pèr ounoura si noumbróusi counvidacioun, intervencioun, rendès-vous, acamp, cous e autre, pèr encas (en toute circonstance) tambèn de persegui la toco que s’èro fisado, emé forço fe.

A ounoura tout si counvit is Acamp Generau de sis escolo, quand n’en fuguère counvida óuficialamen, mai a faugu que se faguèsse representa pèr lou souto-Sendi de Gard Felip Reig à l’Acamp Generau de Sian d’Aqui e pèr lou souto-Sendi d’Erau Gui Bourneton pèr l’Acamp Generau de l’escolo dóu Vidourle.

A teni d’à ment li cous semanié de l’escolo felibrenco d’Aigo-Morto.

A ‘ssegura li cous semanié à la Sant-Gilenco de Sant-Gile.

A espingoula manto uno pervenco, dins manto uno escolo.

A espingoula la cigalo d’argènt de Mèstre d’Obro à Séuveto FARNETI de Lunèu d’Erau.

Mai acò s’aplanto pas aqui, tant lis ativeta de la Mantenènço soun forço noumbrouso e impourtanto. Coume chasque an lis oumenage coustumié soun esta respeta : La Journado dedicado à Founfono Guilherme en Eimargue ; La counmemouracioun de la mort de Frederi Mistral à Maiano, en Aigo-Morto e en Eimargue ; La journado de preparacioun di Vierginenco i Santo ; Lis “Estivada” de Roudés ; L’anniversàri de la neissènço de Frederi Mistral à Maiano ; La Journado di Tradicioun e di Gènt de Mestié de Bouvino i Santo ; Mai tambèn lis edicioun reguliero di buletin soun tambèn respetado emé serious ; Lis emessioun de radiò ; Nòsti participacioun dins li filme d’O e Li Cafè Prouvençau que fan flòri. Nòstis escolo coumençon de prene counsciènci de l’interès d’aquésti cafè, à Lunèu e à Vilatello l’Escolo dóu Vidourle n’an ourganisa un.

Li Gènt d’Eici subre Radiò Delta FM 88.9, qu’acò fai quatre an que soun difusa subre Radiò Lengadò 94.5 e subre d’ùnis anteno Loucalo.

Li filme d’O toujour presènt, emé nòsti Festenau de Filme d’O ourganisa en Aigo-Morto lou darnié dilun de Febrié, e nosto presènci indispensablo au Festenau Taurin e Camarguen de Sant-Geniès-de-Malgouiro.

Se devèn de souligna la flamo participacioun dóu group “Le Cordon Camarguais” qu’an representa la Mantenènço de Lengadò-Roussihoun à la Santo-Estello de Brageira. (Fuguè apoundu au raport d’ativeta après la justo remarco de Dàvi RIBES soun Presidènt).

Avèn soustengu li Parla de Gard ourganisa pèr l’Escolo li Gènt dóu Bufaloun de Mandiuel

Avèn participa à mant un acamp, Castèu-Reinard, Arle, Vendargues, dins lou despartamen culturo, pèr estruire un doursié de presenta à l’UNESCO d’en proumié pèr la Federacioun Franceso de Cousso Camarguenco, e à l’ouro d’aro au proufié de l’Assouciacioun Culturo e Patrimòni Camarguen. (S’avès de besoun s’esclargimen poudrés pausa de questioun au Sendi).

Se poudèn felicita dis esfors que fan nòstis escolo chascuno dins soun relarg, ensignamen, escourregudo, tiatre, cafè, taulo redouno, lotò e que sabe ?

La Mantenènço de Lengadò-Roussihoun a ourganisa sa cinquenco Grand Felibrejado, fuguerian poulidamen bèn reçaupu pèr la Coumuno de Gajan, souto lou beileja dóu felibre Alan DELAGE.

Lou matin pèr l’acamp di Cabiscòu e dis ensignaire noun fuguè d’uno grando capitado, tant mancavon de representant dis escolo e qu’avèn pres un pau trop de retard, mai la Grand Felibrejado dins soun ensèn fuguè forço agradivo e representavo de noste envestimen felibren.

Lou 11 de nouvèmbre se sian recampa au Bos de Santo-Estello à Sant-Adourni pèr la counmemouracioun dóu centenàri de la guerro de 14-18.

Vaqui pèr lou raport d’ativeta qu’ai assaja de n’en faire un resumit proun coumplèt.

 

Lou Secretàri : – Aro li Proujèt pèr 2019 :

 

Lou Secretàri : – Avèn ourganisa, coume aquest an, lou dilun 25 de febrié lou Festenau sieisen de Filme d’O, de 2 ouro de l’après dina à dès ouro de niue emé : “Lou jour di Graio” filme d’animacioun, “Imaginas un Chivau” de Tè Vé Òc, “La Baragogno de Sant-Cristòu” de Michèu Gravier, “Camagri en l’ounour dóu chivau camargue” de Felip Reig, “Un Pouèto, Artisto Pintre Roubert FAURE” de Rougié PÈIRE-AUGUSTE, “Eleicioun de la Rèino d’Arle XXIIIenco” de Julia e Alan BÉRIZZI, “La Preguiero” de Gerard DOUSTALY, “Lou càrri dis enclume” de Felip REIG e pèr acaba “Uno pensado sóuvage” filme de Michèu CHAPDUECLH, qu’a acaba meravihousamen la serado.

– Aquest Festenau de Filme d’O, qu’ourganisan chasque an en Aigo-Morto, lou darrié dilun de febrié, es un di bon mejan d’espandi nosto culturo, encourage nòsti cineasto amatour de faire de filme d’O e s’adrèisso à tout publi. Assajant d’agué de suvencioun de la part la Grand Regioun, qu’acò nous costo forço dardèno, mai l’an passa avèn pas rèn reçaupu, aquest an li suvencioun devien se vouta dins la semano, esperan qu’auren quicon, que sarié regretous de leissa toumba aquest bèu rescontre.

– Avèn forço mounde en aquésti Festenau, mai La Mantenènço sarié encaro mai e miéus representado se i’avié un pau mai de felibre. Tout se fai d’à gràtis, l’intrado, lou béure e lou manja, autambèn que lou parcage, alor l’an que vèn vous voulèn vèire di mai noumbrous.

Voulèn sousteni nòsti Cafè Prouvençau de Sant-Laurèns d’Eigouso, de Vilatello e de Lunèu, e despièi gaire Bèu-Caire e Vergezo.

– Saren presènt à tout ço que toco nosto culturo, coulòqui, librejado e saloun, entrèvo, universita, counmemouracioun, envernissage, filme, emessioun de televesioun e de radiò, e de tout segur que saren en tóuti lis acamp dóu Felibrige.

La Mantenènço de Lengadò-Roussihoun ourganisara pas de càrri pèr la Santo-Estello de Pertus, mai avèn reserva de cambro d’oustalarié pèr pousqué èstre ensèn.

Devrien èstre presènt is “Estivada“ de Roudés la tresenco semano de juliet.

– Coume l’avèn evouca l’an passa voulien crea de rescontre culturau alentour de la lengo, dins lou biais d’uno taulo redouno pèr charra tout simplamen la lengo, pèr faire recounèisse noste lengage e tambèn parla de ço que nous tafuro, pertoco o autambèn ço que nous agrado. (La proumiero se fara pèr la Grand Felibrejado dóu dissate 28 de setèmbre à Lunèu-Vièi, au pargue De Mountaut-Manse, au pica de dès ouro).

– Lou 28 de setèmbre ourganisan la Grand Felibrejado sieisenco dis Escolo Felibrenco, que se debanara à la Coumuno de Lunèu-Vièi. 

Vaqui pèr li principau raport d’ativeta et proujèt.

Lou Sendi : – Gramaci car Secretàri, ………………………..car felibre avès-ti de questioun ?

  • Dàvi RIBES fai remarca que la participacioun dòu group Le Cordon Camarguais noun es marca dins la tiero dis ativeta. Lou Sendi l’asseguro que sara apoundu à la listo.

Bon aro me vau vous demanda d’aprouba lou raport d’ativeta e li proujèt. 

Quau es contro ? 0        . Quau s’astèn ? 0     Lou raport es adóuta à l’unanimeta

Vous gramacìe…

 

Lou Secretàri anóuncio : – 7°/ RAPORT D’ATIVETA DI CABISCÒU DIS ESCOLO (sintèsi facho pèr li souto-Sendi)

 

Lou Secretàri : 1) – Lou souto-Sendi d’Erau, lou Mèstre d’Obro dóu Felibrige Moussu Gui BOURNETON :

Pèr L’Escolo dóu Vidourle emé si cous de Lunèu e Galargue ; un mot sus Lou Parage de Mount-Pelié ; La Nacioun Gardiano ; l’Escolo de Trencavel “la Farandoulo de Beziés e l’escouleto Lou Plantié de Marsihargue.

Lou Secretàri : 2) – Lou souto-Sendi de Lausero, lou Mèstre d’Obro dóu Felibrige Moussu Pau ASTRUC :

Pèr l’Escolo Gabalo e lis Amis de la lengo d’O à Paris. Presentacioun de Mmo BOURGADE, proumiero ajouncho au maire de Mende, Mestresso d’Obro dòu Felibrige, presènto à l’Acamp.

Lou Secretàri : 3) – Lou souto-Sendi de Gard, lou Mèstre d’Obro dóu Felibrige Moussu Felip REIG :

Pèr Païs Nostre – l’Escolo Literàri de la Tour-Magno – lou Ciéucle de Lengo d’O dóu cantoun d’Aigo-Morto – li Gènt dóu Bufaloun – l’Escolo Sian d’Aqui – l’Escolo de Tradicioun de Bèu-Caire, e lis quatre escouleto la Margarideto, lou Parla de Nòstis Àvi, la Sant-Gilenco e l’Escolo d’Argènço.

Lou Sendi : Li resumit e li raport d’ativeta coumplèt dis escolo saran joun is archiéu mantenenciau, uno foutoucòpi sara mandado au Burèu centrau dóu Felibrige.

Gramaci car souto-Sendi, car felibre avès-ti de questioun ?

Adounc aro me vau vous demanda d’aprouba li raport d’ativeta dis escolo. 

Quau es contro ? 0        . Quau s’astèn ? 0     Lou raport es adóuta à l’unanimeta

Vous gramacìe…                          

 

Lou Secretàri anóuncio : – 8°/ RAPORT FINANCIÉ DÓU CLAVAIRE ENRI ALCON

 

Lou Clavaire estènt desencusa, soun raport financié sara legi pèr lou souto-Clavaire Glaude GALANT.

Lou souto-Clavaire : RAPORT FINANCIÉ DE 2018

Car Capoulié, car Majourau, car Felibre, Madamo, Messiés, vous vau legi lou rendu-comte financié de la Mantenènço dóu Lengadò-Roussihoun.

Li comte van dóu proumié de janvié dous milo dès-e-vue au trento un de desèmbre de dous milo dès-è-vue. Se voulès li counsulta, li caièr soun à vosto dispousicioun, devès avedre i man li bilans di despènso e recèto. Li comte fuguèron verifica e aprouva lou 26 mars 2019.

Vau coumença li bilans pèr li despènso.

Despènso dóu proumié de janvié au trento un de desèmbre dous milo dès-e-vue.

Frès de posto : nounanto sièis éurò (96 €)

Festenau dóu filme : cinq-cènt-quaranto-tres éurò seissanto-sèt (543,67€)

Frès “Top Office” : dous-cènt-dès éurò quaranto (210,40€)

Reservacioun autò-càrri Brageirac: tres-milo-dous-cènt-quinge éurò (3215€)

Frès acamp mantenènço : dous-milo-un éurò (2001€)

Frès oustalarié Santo-Estello Brageirac : dous-milo-vue-cènt-trento-sièis éurò cinquanto-dous (2836,52)

Croumpo Filme +Dvd: trento-quatre éurò (34€)

Afihacioun Agept douge éurò (12€)

Repas coundutour càrri : cènt-vint éurò (120€)

Remboursamen Santo-Estello : cinq-cènt-quaranto éurò (540€)

Frès desplaçamen Sendi : quatre-milo-quatre-cènt-sieissanto-nòu éurò (4469€)

Frès croumpo pervenco: cènt-nounanto-dous éurò (192€)

Frès Felibrejado Gajan : cinquanto-nòu éurò cinquanto-sèt (59,57€)

Toutau generau di despènso :

Quatorge-milo-tres-cènt-vint-e-nòu éurò sege. (14329,16€)

FELIBRIGE MANTENÈNÇO LENGADÒ-ROUSSIHOUN LI RECÈTO :

Recèto dóu proumié de janvié au trento-un de desèmbre de dous-milo-dès-e-vue

Recèto Acamp mantenènço : milo-nòu-cènt-sieissanto éurò (1960 €)

Recèto Santo-Estello : nòu-milo-quatre-cènt-vuetanto-vue éurò (9488 €)

Suvencioun e doun : nòu-cènt-cinquanto éurò (950 €)

Recèto pervenco : vint-e-quatre éurò (24 €)

Recèto Festenau dòu filme dous-cènt-nounanto éurò (290 €)

Dèime Felibrige : sièis-cènt-setanto-tres euro vuetanto (673,80 €)

Doun frès desplaçamen Sendi quatre-milo-quatre-cènt-sieissanto-nòu éurò (4469 €)

Toutau generau di recèto : – dès-e-set-milo-vue-cènt-cinquanto-quatre éurò vuetanto (17854,80 €)

Toutau generau di despènso : – quatorge-milo-tres-cènt-vint-e-nòu éurò sege (14329,16 €)

Sòude pousitiéu au trento-un de desèmbre de dous-milo-dès-e-vue.

– sièis-milo-set-e-cènt-vint-e-set éurò setanto-tres (6727,73€)

Verificacioun coumtable : – vint-e-un-milo cinquanto sièis éurò vuetanto-nòu (21056,89 €)

Sòude pousitiéu au trento-un de desèmbre de dous-milo dès-e-set

– tres-milo-dous-cènt-dos éurò nòu (3202,09 €)

Egalita : – vint-e-un-milo-cinquanto-sièis éurò vuetanto-nòu (21056,89 €)

Comte courrènt Soucieta Generalo: – sièis-milo-sèt-e-cènt-vint-e-sèt éurò setanto-tres (6727,73 €)

Lou Sendi : Te gramacìe car Clavaire… car felibre avès-ti de questioun ?

 

Lou Secretàri anóuncio : – 9°/ RAPORT DE L’AUSIDOU DI COMTE PÈR LA MANTENEIRIS DONO SILVETO FARNETI

 

Lou Sendi : Vous gramacìe gènto Manteneiris … car felibre avès-ti de questioun ? 

Adounc aro me vau vous demanda d’aprouba lou raport financié de 2018. 

Quau es contro ? 0        . Quau s’astèn ? 0     Lou raport es adóuta à l’unanimeta

Vous gramacìe…

 

Lou Secretàri anóuncio : 10°/ DELEGA PÈR LA SANTO-ESTELLO DE PERTUS (elegi pèr un an) 

 

Lou Sendi : Presènto li quatre candidat à la delegacioun di titulàri, pièi demando quatre suplènt.

Pèr li 4 Delega titulàri                                                 Pèr li 4 Delega Suplènt

Lou Mantenèire Felip REIG                                                  Lou Mantenèire Sèrgi NURIS

Lou Mantenèire Gui BOUNETON                                          Lou Mantenèire Jan DELPIERRE

Lou Mantenèire Enri ALCON                                                Lou Mantenèire Gui DUPAS

Lou Mantenèire Gui CHAPTAL                                             Lou Mantenèire. Pau VALADIER

Quau es contro ? 0          ……..                                            Quau es contro ? 0            ……..

Quau s’astèn ? 0                                                                 Quau s’astèn ? 0   ……..

Aprouvacioun di titulàri:                                                        Aprouvacioun : di suplènt

 

Lou Secretàri anóuncio : – 11°/ DATO E ENDRÉ DE L’ACAMP GENERAU PÈR 2020 ? 

 

Lou Sendi : Lou Sendi demando is escolo o i vilo de pausa candidaturo :

  • Proupousicioun de Mmo LEVEQUE (facho pèr Felip REIG) pèr reçaupre à Bagnòu-de-Cese siegue l’Acamp Mantenenciau siegue la grand Felibrejado dis escolo :
  • Proupousicioun de Felip REIG de reçaupre l’acamp de la mantenènço à Bèu-caire

Lou Sendi demando que li candidaturo fugon facho pèr escri, un cop li candidaturo reçaupudo lou Burèu mantenenciau faran sa causido. 

 

Lou Secretàri : 12°/ QUESTIOUN DIVERSO :

 

Lou Secretàri : Avèn pas rèn reçaupu pèr l’ouro, mai s’avias quàuqui questioun lou Sendi es lèste pèr vous respondre.

Felip Reig :- Fau redouna à la danso la plaço que se l’amerito ! Li musician meriton miéus que d’acoumpagna lis aperitiéu. Fau ié redouna si letro de noublesso, coume pèr lou tiatre qu’es pas redu i pastouralo. Fan partido de nosto culturo.

Lou Sendi :- Pèr ço qu’es de la creacioun d’un PNR inter-regiounau de Camargo : me sèmblo pas poussible de se subre-pausa au pargue eisistènt. Iéu prepause que belèu poudrien lanceja, coume lou fuguè adeja prepausa i’a quàuquis annado d’acò, uno estencioun subre lou Lengadò de l’atuau Pargue de Camargo, mai acò en aquest tèms d’aqui fuguè rebuta pèr li pouliti d’aquesto pountannado. Resulto leissan toumba noste soustèn à-n-aquest proujèt.

– Avèn Vilatello deman 28 d’abriéu pèr la journado dis artisto e deman tambèn 28 d’abriéu saren à Meirargo pèr la journado D’ARBAUD.

– Les Rencontres de Salinelle lou 15 e 16 jun (Felip REIG representara lou Felibrige lou dissate e Gui BOURNETON lou dimenche – Marìo-Jo GARNIER e Jóuseto BRUNEL lis ajudaran).

– 150 en anniversàri de la neissènço dóu Marqués lou 21 o 22 de setèmbre i Santo-Marìo-De-La Mar.

– Inaguracioun de l’estatuo de Frederi MISTRAL à Toulouso lou 13 e 14 de setèmbre 

Lou Sendi : L’Acamp Generau s’acabo : Moussu lou maire, avans de passa à l’aperitiéu qu’avès lou gentun de nous pourgi, se nous voulès dire quicon, sara emé grand plasé que vous ausiren.

Lou Maire : Lou Maire de Sant-Gile gramacìo la Mantenènço…es urous de nous reçaupre…Gramaci en tóuti aquéli qu’an ajuda. Avèn un desfis d’afrounta : la tendènci de l’armounisacioun e l’unifourmisacioun de nòsti soucieta…fau s’interrouga pèr basti l’aveni e lou futur dóu territòri sènso óublida noste passa : uno vertadiero richesso…noun gouma tout ço qu’es esta fa…noun saupre de mounte venèn e quau sian.

L’enjò de manteni e de trasmetre…lou devé de trasmessioun d’aquesto richesso. Osco ! restas fisançous tout en sachènt que fau coumbatre. 

Lou Sendi : Gramaci Moussu lou Maire, pèr tout acò bèu e subre-tout de la qualita de vosto aculido.

Segne Capoulié ai l’ounour de vous baia la paraulo pèr quicho-clau de la sesiho.

 

Lou mot de Santo Claro : lou Capoulié En Jaque Mouttet.

Quelques mots en Français pour remercier M. le Maire. Vos propos nous touchent, ils nous donnent espoir…nous connaissons les difficultés que vous rencontrez.

Me rejouïsse de l’obro facho eici…Gramaci e coumplimen. Lou Felibrige eisito majamen au nivèu regiounau. Lou burèu saup manteni uno Mantenènço forto, representativo, recouneigudo, travaiarello. Ço qu’entre-prenès vous fai ounour. La forço dóu Felibrige es dins li Mantenènço e lis Escolo. Adounc gramacimen i Cabiscòu, is Escolo e i Felibre…Siéu de voste coustat : n’en fasèn qu’un !

Vaqui quàuqui rendès-vous felibren – La Felibrejado de Cèus.

– La Santo-Estello de Pertus dóu 7 au 11 jun. – Pèr la Santo-Estello de 2020 la vilo de Mende ei candidato ; Mmo BOURGADE proumiero ajouncho au Maire nous dis que la vilo sarié urouso de nous reçaupre à nouvèu (lou proumié cop èro en 1992)…fau travaia emé lis enfant pèr trasmetre.

– Se fau recampa lou 14 de setèmbre à Toulouso pèr lou desvela de l’estatuo Frederi Mistral.

– Avèn lou 150 en anniversàri de la neissènço dóu Marqués lou proumié de nouvèmbre en Avignoun.

 

Lou Sendi : Vous gramacìe Capoulié En Jaque Mouttet pèr tout aquéli bèlli paraulo d’encourajamen e de recouneissènço.

Voudriéu tambèn bèn-astruga nòsti galàntis Arlatenco qu’an pres lou tèms de se couifa e carga lou vèsti pèr nous ounoura de soun agradivo presènci

Sian au picant de miejour passa de cinq, l’Acamp Generau ei clava.

 

Lou Sendi                                                                                                                                             Lou Secretàri

Gabrièu BRUN                                                                                                                                    Sèrgi NURIS

 

Agenda

< 2018 >
Juillet
DLMMJVS
1234567
891011121314
15161718192021
22232425262728
293031    
© Le Felibrige Tous Droits réservés | Réalisation Dream Media® 2016 - Mentions légales et crédits