Mantenènço de Lengadò.
Es au Grau-dóu-Rèi, lou 30 de mars 2008, que se debanè l’acamp mantenenciau annau, en presènci de noste Baile, lou Majourau Jan-Marc COURBET, que nous faguè l’ounour de venir coume representant dóu burèu dóu Felibrige e de noumbrous Felibre emai di Majourau Bosc e Rousset.
Après li gramaci d’usanço, au proumié conse de la vilo M. MOURRUT, deputa-maire, i service teini (pèr soun soutèn lougisti) e au felibre mantenèire M. Bruno GIMET (pèr soun ajudo preciouso), la sesiho coumencè atravalido e fruchouso.
Au cours de l’acamp, li souto sendi fuguèron elegi :
– M. Gabriéu BRUN pèr li despartamen Gard e Ardecho
– M. Noël DANIELE pèr l’Erau
en liò e plaço di cabiscòu MM. D’ANDECY e PLANTIER, tóuti dous Mèstre d’Obro, que se representavon pas. Fuguèron gramacia calourousamen pèr sa bono obro coumplido.
– Dono Louviseto ROUSSET fuguè tourna elegido pèr li despartamen de : Auto Lèiro, Lousero e Isclo de Franço
– Ansin que lou majourau Patris DELMAS pèr Audo, Ariege, Aveiroun, Auto Garouno, Lot, Tarn.
Li felibre e ami dóu Felibrige taulejèron sus lou port, dins uno envirouno estrambourdanto, mounte se coungoustèron d’especialita de la mar.
Après lou cant de la Coupo, la journado amistadouso e freirenalo s’acabè pèr uno vesito dóu Seaquarium, lou musèu de la mar dóu Grau-dóu-Rèi.
***
Rendès-vous es dejà pres pèr l’acamp venènt à Fourques (Gard) lou dimenche 19 d’abriéu 2009 precedi d’uno serado lou dissate 18, pèr festeja lou 150en anniversàri de l’espelido de Mirèio.
